غاية التعليمية يكتُب.. عمرك فكرت إيه اللي بيحصل لما البنوك أو الحكومة تعلن عن خفض الفائدة على أدوات الدين؟ وليه فجأة بنسمع عن تراجع عائد أذون وسندات الخزانة وإزاي ده بيأثر على الاقتصاد والناس؟ وهل ده معناه إن التضخم قرب يهدى؟ ولا في لعبة تانية بتحصل؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

في الأيام اللي فاتت حصلت حاجة لفتت نظر الاقتصاديين والمستثمرين فى السوق المصري وهي ان العائد على أذون الخزانة المصرية اللي مدته 91 يوم تراجع بشكل كبير.. تحديدًا نزل لمتوسط 28.7% بدل 31.2% اللي كان عليه الأسبوع اللي فات.. التراجع ده،اللي بنشوفه لأول مرة من شهور أثار تساؤلات كتير زي هل ده معناه إن الحكومة بدأت تخفف الضغوط الاقتصادية؟ ولا السوق هو اللي بيتغير؟ وإيه علاقة ده بمستقبل الفوايد على الجنيه؟

تعالوا نفهم القصة كاملة ونعرف ايه اللى بيحصل فى كواليس القطاع المصرفي.

وزارة المالية اللي بتصدر أذون الخزانة طلبت اكتتابات بقيمة 25 مليار جنيه الأسبوع اللي فات..اللي حصل إن الطلب كان ضخم جدًا بـ186 مليار جنيه.. لكن وزارة المالية اكتفت بالقيمة اللي هي محتاجاها بس يعني 25 مليار جنيه.. وده نزل متوسط العائد على الأذون بشكل كبير.

طب ليه حصل كده؟

المستثمرين بدأوا يحولوا تركيزهم لأذون وسندات الخزانة الأطول أجلاً زي أذون التسعة شهور أو السندات اللي مدتها سنتين أو تلات سنين.. وده لأنهم متوقعين إن الفايدة هتنخفض قريب فبيحاولوا يضمنوا عائد أعلى لفترة أطول.

كمان البنك المركزي ثبت سعر الفايدة للمرة السادسة على التوالي الأسبوع اللي فات.. وده مؤشر إن السياسة النقدية بدأت تركز على الاستقرار أكتر من رفع الفوايد.. وده دفع المستثمرين للتوجه للأدوات الأطول أجلاً اللي بتديهم عائد مضمون على المدى الطويل.

طب ده بيأثر إزاي علينا؟

بالنسبة للحكومة.. لما العائد على أدوات الدين يقل تكلفة الاقتراض بتقل برضه.. وده بيساعد الحكومة توفر سيولة أكتر للمشروعات والخدمات العامة بدل ما تصرف على الفوايد العالية.. وبالنسبة للاقتصاد ككل انخفاض العائد مؤشر إن السوق ممكن يبتدي يهدى من ضغوط التضخم.. وده هيدعم تحركات خفض الفوايد في المستقبل.

للناس العادية زيي وزيك .. ده معناه إن الفترة الجاية ممكن نشوف شهادات ادخار بفوايد أقل.. فلو عندك فلوس ناوي تحوشها لازم تراقب السوق كويس وتتحرك في الوقت المناسب.

طب والتوقعات عن اللى جاي بتقول؟

المصادر بتقول إن التراجع في العائد على الأذون والسندات ممكن يكمل الفترة الجاية..  خصوصا مع التوقعات بخفض التضخم في 2025.. وده معناه إن المستثمرين هيبقوا أكتر تركيزا على السندات الطويلة الأجل عشان يضمنوا عائد مرتفع قبل ما الفوايد تقل.. في نفس الوقت الحكومة والبنك المركزي هيكملوا يراقبوا السوق ويحاولوا يحققوا توازن بين الاستدانة والاستقرار الاقتصادي.

وخد بالك اللى بيحصل في سوق أدوات الدين ده انعكاس مباشر لحالة الاقتصاد وتوقعاته للفترة الجاية.. كل خطوة في السوق ده بتأثر على الاستثمار وعلى الفلوس اللي في جيب المواطن.. عشان كده لما تسمع عن تراجع في العائد على أدوات الدين اعرف إن ده ممكن يكون مؤشر إيجابي لكن برضه محتاج تفهم الصورة كاملة عشان تتحرك صح.