غاية التعليمية يكتُب.. يا ترى البنك المركزي ناوي على إيه في 2025؟ وهيعمل ايه تحديدا فى اسعار الفايدة؟ وايه التغيرات اللى ممكن تحصل فى ملف السياسة النقدية؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

خليني أقولك في البداية  إن القرار الأخير بتثبيت أسعار الفايدة من البنك المركزي كان متوقع.. لكن اللي متوقع أكتر هو إن 2025 هتشهد تحركات جديدة فى الملف المهم ده.. ولو كنت متابع من فترة هتلاحظ إن التضخم بدأ يقل شوية.. وده معناه إن أسعار الفايدة ممكن تبدأ في النزول تدريجيا.. وفيه توقعات قوية بإن البنك المركزي ممكن يبدأ في خفض الفايدة في الربع الأول من 2025.

طب إيه اللي هيحصل لو الفايدة نزلت؟

لو البنك المركزي خفض الفايدة ده هيسهل على الناس الحصول على قروض سواء لشراء شقة أو تمويل مشروع صغير.. وده كمان هيخلي الشركات تستثمر أكتر لأنها هتلاقي القروض أرخص.

لكن السؤال المهم.. هل الاقتصاد المصري جاهز للمرحلة دي؟ يعني هل التضخم هيفضل في معدل ثابت ولا هيرتفع تاني؟ ده اللي البنك المركزي بيحاول يضمنه الأول.. وخد بالك الموضوع مش بسيط زي ما البعض متخيل.. البنك المركزي مش هينزل الفايدة إلا إذا كان واثق إن التضخم هيفضل تحت السيطرة.. يعني في بداية 2025 لو التضخم استمر في التراجع بشكل ملحوظ هيكون في فرصة كبيرة لتخفيض الفايدة.

طب إيه العوامل المؤثرة في القرار ده؟

أهم عامل هو التضخم لأنه لما الأسعار تزيد بشكل جنوني.. البنك المركزي بيرتفع بأسعار الفايدة علشان يحارب التضخم ويقلل الطلب على السلع والخدمات.. لكن لو التضخم بدأ يقل..ده معناه إن الفايدة ممكن تبدأ في الهبوط وده اللي بدأ يحصل فعلاً في الشهور الأخيرة لكن لسه مش كفاية.

على الجانب التاني .. فيه تأثير كمان للعوامل الخارجية على الاقتصاد المصري.. زي التوترات الجيوسياسية اللي بتأثر على قناة السويس.. واللي ممكن تأثر على دخل مصر من العملات الصعبة..و ده خلّى الحكومة تركز بشكل أكبر على دعم الصناعات المحلية وتحفيز السياحة بالإضافة إلى تحسين تحويلات المصريين من الخارج.

طب إيه اللى متوقع يحصل  في 2025؟

في 2025 الوضع الاقتصادي هيكون صعب.. لكن فيه فرصة حقيقية لتحسن تدريجي.. والحكومة هتركز بشكل كبير على دعم قطاع السياحة والصناعة وده هيكون له تأثير إيجابي في تقليل الضغط على الدولار.. أما عن أسعار الفايدة فالتوقعات بإنها هتنزل في 2025 بشكل تدريجي لكن ده مش هيكون سريع زي ما البعض ممكن يتوقع.. عشان كده لازم نكون مستعدين لأية مفاجآت بس على الأغلب فيه إشارات بإن الفايدة هتبدأ في الانخفاض وبالتالي هنشوف تسهيلات أكبر للمقترضين في السوق.

خلاصة الكلام .. ملف الفايدة لسه تحت المراقبة وإن كان في احتمالية كبيرة إن 2025 يشهد خفض تدريجي لأسعار الفايدة لو استمر التضخم في التراجع.. لكن في النهاية فيه حاجة مهمة لازم تكون عارفها  كل قرار بيأخذ وقته.. البنك المركزي مش هيتسرع وهو بيدرس كل حاجة بدقة عشان ما يحصلش اختلالات تانية في السوق.. ولو كنت بتخطط تاخد قرض أو تستثمر في 2025.. خلي بالك من التغييرات دي لأن الموضوع مش مجرد انخفاض أو زيادة في الفايدة ده ليه تأثير كبير على حياتنا كلنا.