غاية التعليمية يكتُب.. يا ترى إيه اللي بيحصل في اقتصادنا دلوقتي؟ وهل الدولار هيفضل يتحكم فينا؟ ولا فيه أمل نشوف انفراجة قريبة؟ لو بتسأل نفسك الأسئلة دي يبقى لازم تسمع اللي جاي.. لأن فيه خبر جديد من البنك المركزي المصري بيقول إن صافي الأصول الأجنبية لمصر قفز بقيمة 3.5 مليار دولار في يناير 2025، ووصل لـ 8.7 مليار دولار! طب إيه معنى الكلام ده؟ وهل ده معناه إن أزمة الدولار هتخف ولا لسه الطريق طويل؟ والأهم من كده.. إيه هي الأصول الأجنبية أصلاً، وإزاي بتزيد أو تقل؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

أول حاجة لازم نعرفها هو ايه صافي الأصول الأجنبية ده ؟

بساطة صافي الأصول الأجنبية هو الفرق بين الأموال اللي عند البنك المركزي والبنوك التجارية بالعملات الأجنبية -يعني الدولار واليورو وكده- وبين الالتزامات اللي لازم يدفعوها بره مصر.. يعني لو الأصول أكتر من الالتزامات.. يبقى عندنا فائض.. وده اللي حصل في يناير اللي فات.. صافي الأصول زاد بـ 3.5 مليار دولار وده بيخلّي الرقم الكلي يوصل لـ 8.7 مليار دولار.

طب إزاي ده حصل؟

البنك المركزي قال إن البنوك التجارية قلّصت عجزها من 6.4 مليار دولار لـ 3.3 مليار دولار.. يعني خفضت ديونها اللي لازم تدفعها بره بمليار دولار وزوّدت أصولها بمليارين دولار.. في نفس الوقت البنك المركزي نفسه زوّد أصوله بـ 350 مليون دولار لحد ما وصلت لـ 12 مليار دولار. يعني الكل اشتغل صح

طب ده كويس ولا وحش؟ وهل هيأثر على أزمة الدولار؟

لما صافي الأصول الأجنبية بيزيد.. ده بيدي إشارة إيجابية إن فيه سيولة دولارية بتدخل البلد.. سواء من استثمارات أو تصدير أو حتى تحويلات المصريين من بره.. وده بيخلّي البنك المركزي يقدر يتحكم أكتر في سعر الجنيه.. ويقلل الضغط على الدولار في السوق السودا.. يعني بدل ما الدولار يفضل يطلّع ويزيد ممكن نشوف استقرار أو حتى انخفاض في سعره لو الزيادة دي استمرت.. بس طبعا الـ 3.5 مليار دولار دول مش هيحلوا الأزمة لوحدهم لأن مصر لسه محتاجة تدفقات أكبر عشان تغطي احتياجاتها من الاستيراد والديون الخارجية

وعشان نقرب الموضوع ونفهمه أكتر..  الأصول الأجنبية دي زي الجيب بتاعك.. لو دخلك بيزيد والمصاريف بتقل هتعرف تسد احتياجاتك وتحوش كمان.. نفس الحكاية مع البنك المركزي والبنوك.. لما الأصول بتزيد يبقى عندهم قدرة أكبر يدافعوا بيها عن الجنيه.. ويوفروا دولارات للمستوردين.. وده بيخفف الضغط على أسعار السلع اللي بنستوردها زي القمح والزيت.. يعني على المدى الطويل لو الأمور مشيت كده.. ممكن نشوف انخفاض في التضخم واستقرار في الأسعار بس ده محتاج استمرارية مش مجرد قفزة في شهر واحد

طب إمتى الأصول دي بتزيد أو بتقل؟

الأصول بتزيد لما البلد بتجيب دولارات من بره زي لما المستثمرين الأجانب يحطوا فلوسهم في سندات الحكومة أو لما السياحة ترجع تقفز زي زمان أو لما صفقة كبيرة زي رأس الحكمة تتم.. كمان تحويلات المصريين من الخليج وأوروبا بتلعب دور كبير.. على الناحية التانية الأصول بتقل لما الالتزامات بتكتر يعني لو عندنا ديون خارجية لازم نسددها أو لو الاستيراد زاد بشكل كبير ومفيش تصدير يغطي الفاتورة.. وده اللي كان بيحصل في السنين اللي فاتت لما العجز في الأصول وصل لمستويات قياسية قبل ما يبدأ يتحسن من منتصف 2024.