غاية التعليمية يكتُب..  

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

هو ليه الحكومة بتفكر تغير نظام الدعم المقدم للمواطنين فى مصر؟ وهل الدعم النقدي أفضل من العيني فعلا؟ وامتى ممكن يتم تطبيق الدعم النقدي ده ؟ وهو يعني إيه اصلا دعم نقدي؟ وايه علاقة صندوق الننقد الدولي بالموضوع؟

إيه رأيك لو فجأة بدل ما تستلم الزيت والسكر من التموين يجيلك فلوس في جيبك كل شهر.. إيه هي القصة الحقيقية ورا التحول ده؟ هل ده قرار من الحكومة  ولا شروط من الصندوق ؟ ومين المستفيد فعلاً؟

تعالوا نفهم القصة من البداية.. الدولة المصرية بتستعد لتغيير كبير في نظام الدعم التمويني.. الفكرة الأساسية هي تحويل الدعم العيني اللي بيظهر في صورة سلع، لدعم نقدي مباشر.. الموضوع ده مش مجرد اقتراح دي خطة متوقعة هتبدأ تتطبق تدريجيًا وفقا لبعض التسريبات مع بداية السنة المالية الجديدة في يوليو 2025. وده جزء من توصيات الحوار الوطني اللي منتظر نتايجه تتعلن في ديسمبر الجاي

طب ليه الدولة عاوزة تحول للدعم النقدي؟

التحول للدعم النقدي من بين توصيات صندوق النقد الدولي والهدف الأساسي هو ضمان وصول الدعم للفئات الأكثر احتياجًا لأن الدعم العيني الحالي أحيانًا بيوصل لناس مش مستحقة أو بيتسرب.. مش بس كده التحول ده كمان هيقلل الأعباء المالية على ميزانية الدولة اللي بتتحمل حوالي 130 مليار جنيه سنويًا لتغطية دعم السلع التموينية يعني تقريبًا 3.5% من المصروفات العامة

لكن هل ده معناه إننا هنشوف تقليل كبير في العجز المالي اللي بيوصل لـ1.2 تريليون جنيه في السنة المالية 2024-2025؟

الحقيقة لا .. لأن أكبر بند بيضغط على الميزانية هو الديون وفوايدها، واللي بتوصل لـ47% من إجمالي المصروفات.. يعني دعم السلع جزء صغير في الصورة الأكبر

طب الناس شايفة ده إزاي؟
دراسة حديثة وضحت إن في تخوف كبير عند المصريين بخصوص الموضوع ده.. كتير من الأسر بيفضلوا استلام السلع بدل ما ياخدوا فلوس. ليه؟ لأنهم بيشوفوا إن السلع بتضمن احتياجاتهم الأساسية.. لكن الفلوس ممكن تفتح الباب لمشاكل زي إن فرد واحد في الأسرة يسيطر على المبلغ ويصرفه على حاجات تانية وساعتها الأسرة كلها تتضرر

طب الحوار الوطني بيناقش إيه؟
فيه نقاشات كتير حوالين نقاط أساسية.. أول حاجة، مين المؤهل للحصول على الدعم النقدي؟ هل هيكون لكل فرد، ولا المبلغ هيبقى للأسرة بالكامل؟.. تاني حاجة المبلغ ده هيكون ثابت، ولا هيتغير حسب معدلات التضخم عشان يحافظ على القوة الشرائية؟.. وفي الوقت الحالي، فيه حوالي 63 مليون مواطن مستفيدين من منظومة الدعم التمويني فالتغيير ده مش بسيط ومحتاج دراسة وتأني

طب وإيه علاقة صندوق النقد؟
صندوق النقد الدولي بيضغط على الدول اللي بتتعامل معاه عشان تعيد هيكلة نظمها الاقتصادية وتقلل النفقات العامة و التحول للدعم النقدي واحد من الحاجات اللي الصندوق بيعتبرها حلول فعالة لزيادة الكفاءة وتقليل الهدر.. لكن السؤال اللي بيطرح نفسه: هل القرار ده نابع من احتياج حقيقي للإصلاح، ولا مجرد استجابة لضغوط الصندوق؟

الخلاصة.. التحول للدعم النقدي خطوة كبيرة مليانة تحديات وأسئلة ومحتاج نقاش مجتمعي واسع قبل التنفيذ.. القرارات دي بتأثر على ملايين الناس فلازم تكون مدروسة كويس وتراعي احتياجات الأسر وتحدياتهم اليومية