غاية التعليمية يكتُب.. لو عندك فلوس محطوطة في شهادة ادخار.. يا ترى العائد عليها هيقل ولا هيفضل زي ما هو؟ وإيه حكاية إعادة التسعير اللي البنوك شغالة عليها اليومين دول؟ وهل ممكن ده يكون لصالحك كمودع ولا فيه تأثيرات تانية لازم تعرفها؟ فى الفيديو ده هنقولك ايه اللى بيحصل فى كواليس البنوك.

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

البنوك المصرية فيها حركة شغل مكثفة الأسبوع ده.. وكل الكلام عن حاجة اسمها "إعادة تسعير العائد" على منتجات الادخار زي الشهادات وحسابات التوفير… الكلام ده جه بعد ما البنك المركزي المصري قرر يثبت سعر الفائدة للمرة السادسة على التوالي.. وخد بالك إعادة التسعير دي ممكن تكون بداية لتغييرات كبيرة في شكل العوائد اللي بتاخدها من البنك.

خلينا الأول نفهم يعني إيه "إعادة تسعير العائد"؟ 
ببساطة البنوك بتقعد مع بعضها في لجان اسمها "الأليكو" واللجان دي بتقرر لو الفايدة اللي بتديها على الشهادات وحسابات التوفير محتاجة تتغير ولا لأ.

طب ليه التوقعات بتقول ان الفايدة ممكن  تقل؟

فيه اسباب كتير لتوقعات انخفاض الفايدو.. وأول سبب إن تكلفة الفلوس اللي البنك بيقترضها أو بيشغلها بقت غالية ومعظم البنوك دلوقتي بتحاول توازن بين العوائد اللي بتديها للعملاء وبين أرباحها.. وتانى حاجة فيه توقعات قوية إن البنك المركزي هيخفض سعر الفايدة في فبراير اللي جاي فالبنوك بتحاول تستبق القرار عشان تظبط حساباتها من دلوقتي.

يعني إيه الكلام ده عملياً؟

خلينا ندي أمثلة ..البنك العربي الأفريقي الدولي قرر يخفض العائد على حساب التوفير "جولدن" بنسبة 3% يعني لو كنت بتاخد فايدة 23.5% دلوقتي هتاخد 20.5%.. كمان بنك قناة السويس أطلق شهادة جديدة اسمها "الحصاد" بس الفايدة عليها متغيرة مش ثابتة.. والبنوك بدأت تروّج لمنتجات جديدة بفوايد متغيرة.. يعني الفايدة بتاعتك هتتغير حسب السوق وسعر الفايدة اللي البنك المركزي بيعلنه.

السؤال المهم.. إيه تأثير الكلام ده عليك؟

بص .. لو عندك شهادة ادخار بفوايد مرتفعة ممكن البنك يقلل العائد عليها لما تجددها بعد انتهائها.. لو بتفكر تحط فلوسك في شهادة جديدة غالباً هتلاقي الفايدة أقل من اللي كنت بتاخدها قبل كده.. ولو بتدور على استثمار مرن المنتجات متغيرة الفايدة ممكن تكون اختيار مناسب لو عايز عائد مرتبط بالسوق.

وكتير من المحللين الماليين بيتوقعوا إن الفوايد على الشهادات وحسابات التوفير هتبدأ تنخفض تدريجيا خصوصا مع توجه البنك المركزي لتقليل سعر الفايدة في المستقبل.. وكالة زي "فيتش سوليوشنز" توقعت إن سعر الفايدة هيقل بحوالي 12% بشكل تراكمي على مدار 2025.. كمان البنك الأهلي المصري قال إننا ممكن نشوف انخفاض في الفوايد بين 3% و6% السنة اللي جاية.

في النهاية إعادة تسعير العائد هي حركة طبيعية البنوك بتعملها عشان تواكب التغيرات الاقتصادية.. ولو عندك فلوس في شهادات أو حسابات توفير لازم تكون جاهز لأي تغييرات ممكن تحصل في الفايدة اللي بتاخدها.. ولو لسه بتفكر تستثمر فلوسك خد وقتك في البحث وسؤال البنوك عن المنتجات المتاحة وأكتر حاجة مناسبة لاحتياجاتك.