غاية التعليمية يكتُب.. إزاي تاخد قرارات مالية صح؟ وإزاي تحمي نفسك من الوقوع في فخ القروض غير المدروسة وتفهم المصطلحات المالية اللي بتسمعها كل يوم؟ وهل ممكن الشمول المالي يغير حياتنا فعلاً؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

البنك المركزي المصري قرر ياخد خطوة جديدة ومهمة جدًا علشان يساعد الناس تفهم أكتر عن الفلوس..  وإزاي يتعاملوا بيها بطريقة صحيحة من خلال حملة ضخمة للتثقيف المالي أطلقها البنك المركزي بالتعاون مع الاتحاد الأوروبي والوكالة الألمانية للتعاون الدولي  والمعهد المصرفي المصري.

 الهدف تبسيط المفاهيم المالية لكل الناس ونشر الوعي بالمفاهيم الأساسية زي الشمول المالي حماية المستهلك ماليًا وحتى نظم الدفع والتضخم.

والفكرة ببساطة مبنية على ان حضرتك لو فهمت أكتر عن الفلوس والبنوك والخدمات المصرفية هتقدر تاخد قرارات مالية صح وهتعرف تستفيد من الخدمات دي بدل ما تسيبها بعيدة عنك.

اصلا أهمية التثقيف المالي والشمول المالي؟

الموضوع ده مهم جدًا.. والتثقيف المالي هو إنك تبقى فاهم إزاي تدير فلوسك وإزاي تختار المنتجات المصرفية المناسبة ليك سواء كان حساب توفير، قرض، أو بطاقة ائتمان.

الشمول المالي معناه كمان إن كل فئات المجتمع يكون عندها فرصة تستفيد من الخدمات المصرفية سواء كنت شاب لسه بادئ حياتك أو ست بيت أو مزارع أو حتى من ذوي الهمم.

والبنك المركزي بيقول إن الفكرة مش بس في توفير الخدمات دي لكن كمان في إنك تبقى فاهمها وتعرف إزاي تستفيد منها بأفضل شكل.وده اللي بتسعى الحملة إنها تحققه.

طب الحملة دي بتقدم إيه بالظبط؟

تم إعداد محتوى سهل ومبسط بيشرح أهم المفاهيم المالية زي الشمول المالي حماية المستهلك، نظم الدفع، والتضخم.. والحملة مش موجهة لفئة معينة لكن لكل الناس من المرأة والشباب لرواد الأعمال والمستثمرين وحتى كبار السن والفلاحين.

فيه ناس كتير عندها تخوف أو عدم ثقة في القطاع المصرفي.. الحملة دي بتساعد في تعزيز الثقة عن طريق توضيح دور البنوك في دعم الأفراد والمجتمع.

وطبعًا ده بيجي في إطار مشروع أكبر اسمه 'تعزيز الشمول المالي والرقابة المصرفية في مصر' اللي بدأ في 2018 بالتعاون مع الاتحاد الأوروبي والحكومة الألمانية.

طب إيه اللي ممكن يتغير فعليًا مع الحملة دي؟

لما تفهم يعني إيه فوائد مركبة أو إزاي تختار القرض المناسب ليك حياتك هتبقى أسهل بكتير.. وكمان ريادة الأعمال دلوقتي بقت من أهم القطاعات اللي بتدعم الاقتصاد ومع الفهم المالي رواد الأعمال هيقدروا يديروا مشاريعهم بطريقة أفضل.

وسواء كنت بتدفع إلكتروني أو بتستخدم محافظ رقمية أو حتى بتتعامل بالكاش... لما تكون فاهم النظم دي هتعرف تستفيد منها بشكل أكبر.

بمعنى تاني... الحملة دي مش مجرد معلومات، دي خطوة لتغيير ثقافة مالية كاملة ولازم تكون عارف ان التثقيف المالي مش رفاهية ده أداة أساسية علشان نعيش حياتنا بشكل أفضل ونتجنب الوقوع في أزمات مالية.. وحملة البنك المركزي المصري بالتعاون مع الاتحاد الأوروبي والوكالة الألمانية للتعاون الدولي (GIZ) والمعهد المصرفي هي خطوة في الاتجاه الصح علشان كل مواطن يبقى عنده فرصة يفهم أكتر عن الفلوس والخدمات المصرفية والشمول المالي.