غاية التعليمية يكتُب.. إيه اللي ممكن يخليك فجأة تلاقي نفسك غارق في ديون من غير ما تحس؟ ولا إيه اللي يخلّيك تتحكم في مصروفك وما تقلقش من حاجة؟ لو بتستخدم بطاقة بنكية، بس مش عارف تفرّق بين بطاقة الخصم (الديبت) وبطاقة الائتمان (الكريدت)، يبقى لازم تسمع الكلام ده كويس لأن الفرق بينهم مش بس في الاسم، ده في حياتك كلها.

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

بص يا سيدي  بطاقة الخصم (الديبت) دي بتاعة الفلوس اللي فعلاً عندك.. يعني لما تروح تسحب من الـ ATM أو تدفع في سوبر ماركت.. الفلوس دي بتتخصم على طول من حسابك في البنك. مفيش هزار مفيش كلام فاضي، اللي في الحساب هو اللي هتقدر تصرفه.. لو معاك 5000 جنيه في الحساب، يبقى دي حدودك، مفيش حاجة زيادة. . دي حلوة لو بتحب تعيش في الأمان وما تقلقش من الديون لأنك بتصرف من جيبك وبس.

طب ولو الحساب فاضي؟

هنا بقى بطاقة الخصم هتقولك: "روح هات فلوس الأول يا معلم!' يعني لو حاولت تشتري حاجة بـ 2000 جنيه والحساب فيه 1000 بس، المعاملة هتترفض على طول. كده كده، الديبت دي زي الصديق الصادق اللي بيقولك الحقيقة في وشك، من غير لف ولا دوران.

نيجي بقى للبطاقة التانية، بطاقة الائتمان (الكريدت)… دي بقى حكايتها مختلفة خالص! البنك بيديك بيها مبلغ معين، يعني زي قرض صغير ويقولك: 'اتفضل اصرّف.. وأنا هعدّيها دلوقتي بس هترجعلي الفلوس بعدين.. يعني ممكن تشتري موبايل بـ 20 ألف جنيه وأنت في جيبك 5 آلاف بس.. لأن البنك هو اللي بيدفع عنك الأول.

حلوة، صح؟ بس استنى.. فيه كمين

الكريدت دي بتيجي مع فوايد.. لو ما سددتش المبلغ في الوقت اللي البنك حدده، يعني فترة السماح اللي بتبقى حوالي 30 أو 45 يوم، هتبدأ الفوايد تتراكم. ومش أي فوايد، دول بيبقوا نسبة كبيرة أحياناً، ممكن توصل لـ 2.5% أو 3% في الشهر على المبلغ اللي ما دفعتهوش.. يعني لو اشتريت حاجة بـ 10 آلاف وما سددتش في الوقت، المبلغ هيزيد وهيتحول لكابوس

طب وإيه اللي يحدد إنت تستخدم إيه؟

لو بتحب تتسوق أونلاين أو تسافر.. الكريدت ممكن تكون عملية أكتر.. لأنها بتديك مرونة وبتساعدك تحجز فنادق وطيارات بسهولة.. كمان فيه بنوك بتديك كاش باك أو نقاط تتكسبها لما تستخدم الكريدت.. لكن لو مش منظم في مصروفاتك.. ممكن تلاقي نفسك بتدفع ديون وفوايد لغاية 2026

أما الديبت، فدي للي عايز يعيش في السليم وما يحبش يترعب كل ما يشوف فاتورة.. بس عيبها إنها مش هتنفعك لو عايز تشتري حاجة غالية والفلوس مش موجودة دلوقتي.. يعني لو عينك على لاب توب جديد وما ادخرتش ليه، هتستنى لما تجمع الفلوس

الاختيار بتاعك. .عايز تعيش براحة بال وتتحكم في كل مليم؟ اختار الديبت. عايز تعيش مغامرة وتصرف زي الملوك بس تكون مستعد تسدد؟ الكريدت موجودة..  المهم اعرف نفسك كويس.. لأن البطاقة دي مش لعبة.. دي حياة.