إزاي الرئيس عبدالفتاح السيسي قدر يعبر بمصر فترة من أصعب الفترات؟ وإزاي بلد محاطة بكل المشاكل دي حروب .. أزمات اقتصادية عالمية .. تضخم .. ومع ذلك تقدر تقف على رجلها وتثبت إنها صلبة وقوية؟ وإزاي قدر يحول كل التحديات لفرص ويقنع المستثمرين الأجانب ييجوا يحطوا فلوسهم فى مصر..  وإزاي الاقتصاد المصري بقى حديث العالم بفضل رؤيته وبعد نظره.

وسط الزخم العالمي اللي احنا عايشين فيه .. كل يوم بنسمع عن أزمة جديدة .. سعر الدولار بيطلع .. أسعار الطاقة بتجنن .. سلاسل الإمداد متلخبطة .. وفي المنطقة حوالينا .. الدنيا مقلوبة من الصراعات والحروب .. لكن وسط كل ده .. الاقتصاد المصري قدر يقاوم ويتحمل الصدمات .. مش بس كده .. ده كمان بقى نموذج يتحاكى عنه.

طب إزاي الرئيس السيسي قدر يعمل كل ده ؟

السر في البنية التحتية الاستثمارية القوية اللي السيسي حط أساسها .. الراجل كان دايما باصص لبعيد .. وقرر إن البلد لازم تبني نفسها من تحت لفوق .. مش مجرد حلول مؤقتة .. لا .. خطة كبيرة وطموحة تخلّي مصر جاهزة لأي أزمة.

وخلّونا نتكلم عن المشروعات العملاقة اللي بقى الكل يشوفها .. العاصمة الإدارية الجديدة .. مدينة المستقبل بكل معاني الكلمة .. قناة السويس اللي بقت شريان حياة للتجارة العالمية .. ومشروعات الطرق والكباري اللي ربطت مصر من أولها لآخرها .. ده غير محطات الكهرباء والطاقة المتجددة اللي خلّتنا نتحول من بلد بتعاني من انقطاع الكهرباء لبلد بتصدّر طاقة .. دي مش مجرد مشروعات يا جماعة .. دي رؤية متكاملة بتحمي الاقتصاد وتخلّيه ينافس عالميًا؟.

ومش بس كده .. السيسي دعم المنتج المحلي بطريقة ذكية جدًا .. بدل ما نستورد كل حاجة من برا .. بقينا نصنّع وننتج .. المصانع الجديدة اللي اتفتحت .. الزراعة اللي بقت أقوى بفضل المشروعات زي الدلتا الجديدة وتوشكى .. ده كله خلّى الاقتصاد المصري يعتمد على نفسه أكتر .. ويبقى جاهز لأي صدمات خارجية .. مش بس بنستورد أقل .. لا .. احنا كمان بنصدّر أكتر .. والمنتجات المصرية بقت علامة مسجلة في السوق العالمي وكل يوم بتغزو أسواق جديدة وبتوصل لأماكن عمرها ما وصلت ليها قبل كده .

في الوقت اللي العالم كله كان بيترنح من أزمة كورونا .. والتضخم اللي ضرب كل الاقتصادات الكبيرة .. مصر كانت بتثبت إنها مختلفة .. السيسي قدر يحافظ على استقرار السوق .. ويخلّي العملة المصرية تقاوم الضغوط .. ده مش كلام وخلاص.. دي أرقام وحقائق .. في مارس 2025 .. لسه بنشوف إزاي البلد دي بتقاوم التحديات وتطلع أقوى .. وده بفضل زعيم شاف اللي محدش شافه .. وحط خطة محدش فكر فيها.

الجميل بقى إن السيسي مش بس بيفكر في النهاردة .. ده بيفكر في بكرة .. بيفكر في جيل كامل جاي .. عشان كده لما بنبص على إنجازاته .. بنلاقيها مش مجرد كلام حلو .. لا .. دي حاجات ملموسة على الأرض .. مدن جديدة .. اقتصاد قوي .. بنية تحتية متينة .. وشعب بقى يثق إن بلده ماشية صح .. الراجل ده فعلًا عمل معجزة .. ووسط كل الضغوط دي .. قدر يثبت إن مصر مش أي بلد .. مصر بلد السيسي .. بلد المستقبل.

الشيء المؤكد ان السيسي مش بس رئيس .. ده رجل رؤية .. رجل إنجازات .. قدر ياخد بلد كانت في مفترق طرق .. ويحطها على الطريق الصح .. الاقتصاد المصري النهاردة مش بس صامد .. ده كمان بيكبر وينافس .. وكل ده بفضل بعد نظره وحكمته .. تحية لفخامة الرئيس السيسي .. تحية لزعيم عمل معجزة في زمن المعجزات فيه نادرة.