غاية التعليمية يكتُب.. يا ترى ايه اللى بيحصل فى سوق صرف العملات الأجنبية .. وليه سعر الدولار نزل فجأة بعد صرف الشريحة الرابعة من قرض صندوق النقد الدولي .. وهل التراجع ده حاجة مؤقتة ولا ممكن يفضل مستمر ونشوف الجنيه بياخد نفَس .. والسؤال الأهم إيه اللي ممكن يحصل لسوق الصرف في مصر الفترة الجاية ..

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

الدولار كان لسه من كام يوم بيحقق مستويات قياسية.. وبيوصل لأرقام تخليك تقول 'يا ساتر'.. لكن فجأة.. وبعد ما صندوق النقد الدولي أقرّ المراجعة الرابعة وصرف الشريحة الرابعة من القرض – اللي قيمتها 1.2 مليار دولار – لقينا الدولار بدأ يهدّى شوية.. في البنك المركزي.. سعر البيع استقر عند 50.58 جنيه.. بعد ما كان 50.72 جنيه.. يعني نزول بسيط لكنه ملحوظ.. وفي البنوك زي الأهلي ومصر والتجاري الدولي.. الدولار بقى بيتشرى بـ50.6 جنيه وبيتباع بـ50.7 جنيه.. حتى في بنك قناة السويس.. وصل لـ50.75 جنيه للبيع.. وفي كريدي أجريكول نزل لـ50.69 جنيه.. يعني باختصار الدولار خد خطوة لورا.

طب  ليه الدولار بدأ يتراجع؟ 
الحكاية مش سحر ولا معجزة.. ده نتيجة حاجات كتير اتجمعت مع بعض.. أول حاجة.. صرف الشريحة الرابعة دي بتدي رسالة قوية للسوق إن مصر ماشية صح في برنامج الإصلاح الاقتصادي بتاعها مع صندوق النقد.. الـ1.2 مليار دولار دول بيدخلوا الاقتصاد.. بيزوّدوا السيولة الدولارية.. وده بيخفف الضغط على الجنيه شوية.. ثاني حاجة.. صندوق النقد قال إنه هيدي مصر قرض جديد بـ1.3 مليار دولار تحت اسم 'برنامج المرونة والاستدامة'.. لكن ده هيتصرف على 10 دفعات.. كل دفعة مرتبطة بإجراء معين مصر لازم تنفذه.. يعني فيه فلوس جاية في الطريق.. وده بيدي ثقة للمستثمرين إن الوضع في تحسن.

كمان.. مصر نفذت إجراءات تصحيحية بعد ما كان فيه معيارين ماليين مكانوش متحققين في ديسمبر اللي فات.. الأول عن خفض تمويل البنك المركزي للقطاع العام.. والتاني عن تحقيق فائض أولي 4.5%.. الصندوق وافق يدينا إعفاء عن المعيارين دول.. وده ساعد إن السوق يهدى ويبدأ يثق أكتر في الاقتصاد.. يعني ببساطة.. تقدر تقول ان  الدولار حس إن فيه دعم بيجيله من برا.. فقال خلاص.. مش لازم أعافر أكتر من كده دلوقتي.

السؤال المهم هل الدولار هيفضل نازل كده ولا دي مجرد استراحة محارب؟

بصراحة الإجابة مش سهلة خالص.. لأنها بتعتمد على حاجات كتير.. رئيسة بعثة صندوق النقد في مصر.. إيفانا فلادكوفا هولار.. قالت إن الاقتصاد المصري متوقع ينمو بنسبة 4.1% في السنة المالية الجاية 2025-2026.. وإن التضخم هيوصل لـ13.4% بنهاية السنة دي.. لكنها قالت كمان إن التوقعات دي ممكن تتغير حسب تقرير الصندوق الجاي عن الاقتصاد العالمي.. يعني الوضع لسه فيه احتمال يتقلب.

ولو بصينا على اللي بيحصل دلوقتي.. التراجع ممكن يستمر لو مصر نجحت في جلب استثمارات أجنبية أكتر وزيادة السيولة الدولارية.. خصوصًا مع المراجعة الخامسة اللي متوقعة قبل يونيو الجاي.. لو الشريحة الخامسة اتصرفت في وقتها.. ده هيدي دفعة جديدة للجنيه.. لكن في نفس الوقت.. لو حصل أي اضطرابات خارجية – زي مشاكل جيوسياسية أو تراجع إيرادات قناة السويس – ممكن الدولار يرجع يعافر تاني.. يعني التراجع ده مش مضمون 100% إنه هيفضل.. لكنه بردو مش مستبعد لو الحكومة لعبت صح.