غاية التعليمية يكتُب.. يا ترى إيه اللي بيحصل في سوق العربيات دلوقتي.. وليه الأسعار بدأت تنخفض كده فجأة.. ولو نفسك تشتري عربية جديدة تشتري حالا ولا تستنى شوية يمكن الأسعار تنزل أكتر؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

سوق العربيات في مصر بيشهد حالة غريبة شوية.. الأسعار .. سواء عربيات جديدة أو مستعملة .. بدأت تنزل بشكل ملحوظ اليومين دول.. يعني فجأة تلاقي شركات ووكلاء بيعلنوا تخفيضات من 5 لـ 15% على كل الفئات.. وفيه عربيات وصل التخفيض فيها لـ 150 و200 ألف جنيه.. تخيل.. اللي كان بيحلم بعربية بمليون جنيه دلوقتي ممكن يلاقيها بـ 850 ألف أو أقل كمان.

طب إيه السبب ورا الهبوط ده؟

أول حاجة.. الطلب على العربيات نزل جامد السنة اللي فاتت.. الناس كانت خايفة تشتري بسبب الأسعار اللي وصلت للسما والمعروض اللي كان قليل.. بس دلوقتي الوضع اتغير.. الشركات بدأت تفتح اعتمادات مستندية مع البنوك تاني بعد ما العملة بقت متوفرة.. وده خلّى المعروض يزيد.. يعني بدل ما العربيات كانت بتيجي على القطارة.. دلوقتي الوكلاء بيجيبوا شحنات جديدة.. وده ضغط على الأسعار لتنزل.. كمان.. ظاهرة الأوفر برايس .. اللي كان بيتضاف زيادة على سعر العربية الرسمي بدأت تختفي.. لأن التجار مش عايزين العربيات تقعد في المخازن.

تاني سبب كبير.. التصنيع المحلي بدأ يلعب دور.. خلال الشهرين اللي فاتوا.. 3 مصانع عربيات فتحوا في مصر.. وبدأوا ينتجوا موديلات اقتصادية بأسعار تنافسية.. مثلاً.. عربية زي بروتون ساجا نزلت بـ 650 ألف جنيه.. وجيلي بـ 850 ألف.. وأوبترا بـ 720 ألف.. العربيات دي خلّت المنافسة تزيد.. والبدائل بقت كتير قدام الناس.. فالوكلاء اضطروا يخفضوا الأسعار ويعملوا عروض عشان يبيعوا.. يعني الموضوع بقى في صالحك كمستهلك.

حتى سوق المستعمل ما سلمش من الهبوط ده.. الأسعار الجزافية اللي كان بيحطها أصحاب العربيات المستعملة السنة اللي فاتت .. لما المعروض كان ضعيف .. بدأت تتراجع بسرعة.. ليه.. لأن العربيات الجديدة بقت أرخص من المستعمل في بعض الحالات.. فالناس بقت تفكر مرتين قبل ما تدفع فلوس زيادة في عربية مستعملة.. ده غير إن الشركات بقت بتقدم تسهيلات في السداد وتقسيط على فترات أطول.. وده بيضغط على أسعار المستعمل أكتر.

نيجي لسؤال مهم لو عايز تشتري عربية جديدة.. تعمل إيه.. تشتري دلوقتي ولا تستنى؟

بص.. الوضع دلوقتي حلو جدًا للشراء.. الأسعار نزلت.. المعروض بيزيد.. والتخفيضات شغالة.. مثلا شركات زي جي بي أوتو .. وكيل هافال .. خفضت أسعار موديلاتها من 40 لـ 60 ألف جنيه.. وكيا سبورتاج 2025 نزلت من 150 لـ 175 ألف جنيه لبعض الفئات.. يعني لو عندك الميزانية.. ممكن تلاقي صفقة حلوة دلوقتي.. بس فيه ناس بتقول إن الأسعار ممكن تنزل أكتر لو استمر المعروض في الزيادة والطلب ظل ضعيف.

لكن خلّي بالك.. فيه آراء تانية بتقول إن التخفيضات دي ممكن تكون مؤقتة.. يعني الشركات بتعمل عروض لفترة معينة عشان تتخلص من المخزون الزايد.. وبعدين ترجع تثبت الأسعار تاني.. كمان.. الوكلاء بيقولوا إن الاستيراد لسه ما رجعش لمستواه القديم.. يعني لو الطلب زاد فجأة.. ممكن الأسعار تتراجع عن النزول وتبدأ ترتفع تاني.. فلو ناوي تشتري.. لازم تكون عينك مفتوحة وتتابع السوق كويس.