غاية التعليمية يكتُب.. وفقا لآخر بيانات صادرات مصر غير النفطية زادت بنسبة 30% في يناير ووصلت لأكتر من 4.3 مليار دولار.. فيا ترى إيه معنى الكلام ده؟ وإزاي ممكن يأثر على أزمة شح الدولار اللي بنعاني منها؟ ويعني إيه أصلاً صادرات غير نفطية؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

فى الأول خلينا نقول لحضراتكم يعني إيه صادرات غير نفطية؟

الصادرات غير النفطية هي المنتجات والسلع اللي بتصدرها مصر للخارج ومش مرتبطة بالبترول ومشتقاته.. يعني أي حاجة غير النفطية زي المنتجات الزراعية.. الملابس.. الكيماويات.. الأجهزة الإلكترونية ومواد البناء وحاجات تانية كتيرة.

ووفقا لبيانات حكومية .. في يناير اللي فات.. صادرات مصر غير النفطية وصلت لـ4.3 مليار دولار مقارنة بـ3.3 مليار دولار في نفس الشهر من 2024.. يعني زيادة بنسبة 30%.

طب ايه أهم القطاعات اللي ساهمت في الزيادة دي؟

فيه قطاعات كتير حققت نمو ملحوظ  منها مواد البناء والصناعات المعدنية اللى صادراتها وصلت لـ1.48 مليار دولار في يناير مقارنة بـ679 مليون دولار في يناير 2024، يعني زيادة بنسبة 119%.

كمان الكيماويات والأسمدة، الصناعات الهندسية والإلكترونية، الحاصلات الزراعية، والصناعات الغذائية.. القطاعات دي مجتمعة حققت صادرات بقيمة 3.7 مليار دولار، وده بيمثل 86% من إجمالي الصادرات في يناير.

وإيه تأثير الزيادة دي على أزمة شح الدولار؟

مصر بتعاني من فترة من نقص العملة الصعبة وده بسبب عوامل كتير منها العجز في الميزان التجاري والفجوة بين قيمة الواردات والصادرات. في 2022 العجز فيها وصل لـ31.2 مليار دولار.. كمان تراجع إالاستثمارات الأجنبية بسبب الأوضاع الاقتصادية العالمية والمحلية.. بالاضافة لعوامل تانية.

فلما صادراتنا غير النفطية تزيد ده بيدخل عملة صعبة أكتر للبلد وده ممكن يساعد في تقليل العجز في الميزان التجاري لأن  لما نصدر أكتر.. العجز بيقل.. وده بيحسن الوضع الاقتصادي.

كمان هيتم  توفير الدولار للاستيراد.. والشركات والمصانع اللي محتاجة تستورد مواد خام أو معدات هتلاقي الدولار متوفر أكتر.

بالاضافة لحاجة مهمة جدا وهي  تعزيز الاحتياطي النقدي.. لأن زيادة الصادرات بتساهم في رفع احتياطي النقد الأجنبي.. وده بيدي ثقة أكبر للمستثمرين.

طب هل الزيادة دي كافية لحل الأزمة؟

بالرغم من إن الزيادة دي خطوة إيجابية.. لكنها مش كافية لوحدها لحل أزمة شح الدولار.. لأن حجم الواردات كبير..  مصر لسه بتستورد بقمية كبيرو..  وده بيضغط على الاحتياطي النقدي.. مصر كمان عليها التزامات ديون كبيرة بالدولار.. وده بيزود الطلب على العملة الصعبة.. ومحتاجين نجذب استثمارات أجنبية أكتر عشان ندخل عملة صعبة ونقلل الضغط على الدولار.

طب إيه المطلوب لتحسين الوضع؟

ده سؤال مهم جدا.. والاجابة عليه هتقولك احنا ممكن نعمل ايه وهنوصل لفين فى أزمة شح العملة.

بص يا سيدي عشان نحل ازمة الدولار لازم نركز على قطاعات مختلفة زي السياحة.. الصناعة.. والتكنولوجيا.. لأن دي قطاعات لو صدرت بكميات كبيرة هتحل الأزمة بشكل جذري.

كمان تشجيع الاستثمار المحلي والأجنبي بتسهيل الإجراءات وتقديم حوافز للمستثمرين.. وكمان تقليل الاستيراد عن طريق دعم الصناعات المحلية لتلبية احتياجات السوق المحلي.. وتحسين جودة المنتجات عشان نقدر ننافس في الأسواق العالمية ونزود صادراتنا.