من ينتصر في الصدام الكبير.. ترامب في مواجهة صقور الفيدرالي - غاية التعليمية

غاية التعليمية يكتُب.. هو ينفع رئيس أمريكا يدخل في خناقة علنية مع أكبر مؤسسة مالية في البلد؟ وإزاي الهجوم المتبادل بين ترامب والاحتياطي الفيدرالي ممكن يغير شكل الاقتصاد العالمي؟! وهل فعلاً قرارات الفيدرالي ممكن تعطل ترامب عن تنفيذ خططه؟! 

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

الفترة اللي فاتت حصل تصعيد كبير بين الرئيس الأمريكي دونالد ترامب وبنك الاحتياطي الفيدرالي.. ترامب بيضغط بكل قوته علشان الفيدرالي يخفض أسعار الفايدة.. لأنه شايف إن ده هيحرك الاقتصاد ويوسع الاستثمارات.. لكن الفيدرالي عنده حسابات تانية خالص ورافض يخضع للضغوط السياسية.

جيروم باول.. رئيس الفيدرالي عنده أولوياته الواضحة..  التضخم لازم يفضل تحت السيطرة.. ومش هيخاطر بخفض الفايدة إلا لو كان متأكد إن الاقتصاد مش هيندفع ناحية أزمة تضخم جديدة. وده اللي عامل صدام بينهم.

طب ايه هي قرارات ترامب اللي فجرت الأزمة؟ 
ترامب قرر يلعب سياسة الحمائية الاقتصادية بجد.. وفرض رسوم جمركية ضخمة على الصين وكندا والمكسيك وحتى بعض دول أوروبا.. المفروض حسب كلام ترامب إن ده هيحمي الاقتصاد الأمريكي ويوفر وظائف جديدة.. لكن الفيدرالي شايف الصورة من زاوية مختلفة.

التحذير اللي خرج من الفيدرالي بيقول  الرسوم الجمركية دي هتزود الأسعار.. وبالتالي هتزود التضخم.. يعني بدل ما نخفض الفايدة زي ما ترامب عايز ممكن نضطر نثبتها أو حتى نرفعها وده عكس اللي الرئيس عاوزو تماما.

طب مين اللي معاه الحق فى الخناقة والصدام ده؟
في معسكر ترامب المليارديرات والمستثمرين اللي عايزين فلوس رخيصة عشان يقترضوا ويوسعوا أعمالهم..أما في معسكر الفيدرالي فالبنوك المركزية والخبراء الاقتصاديين اللي شايفين إن الطباعة الزايدة للدولارات مع خفض الفايدة ممكن تخلّي التضخم يخرج عن السيطرة ويضرب الطبقات الفقيرة في أمريكا.

وايه السيناريوهات المتوقعة للصدام الكبير ده ؟ 
لو الفيدرالي خضع لترامب وخفض الفايدة.. التضخم هيزيد.. بس ممكن نشوف ارتفاع في البورصة وزيادة في الاستثمارات.. و لو الفيدرالي أصر على موقفه.. الاقتصاد هيبقى تحت ضغط وترامب ممكن يصعد الهجوم ويمكن يهدد بإقالة جيروم باول
أما السيناريو الأخطر بقا.. لو ترامب كمل في طريقه والفيدرالي رفض يتحرك ممكن نشوف أزمة مالية عالمية بسبب التوترات التجارية والقرارات الاقتصادية المتضاربة.

ولازم تكون عارف .. ان المعركة دي مش مجرد صراع بين رئيس أمريكي وبنك مركزي.. دي معركة هتشكل مصير الدولار نفسه والاقتصاد العالمي..  السؤال المهم اللى شاغل العالم كله حاليا ومسيطر على تفكير رجال المال والاعمال : مين اللي هيكسب؟ الفيدرالي اللي بيحمي الاستقرار؟ ولا ترامب اللي بيلعب سياسة هجومية؟