بعد قرار الاحتياطي الفيدرالي الأمريكي.. ايه توقعات سعر الفايدة في مصر - غاية التعليمية

غاية التعليمية يكتُب.. بعد قرار مجلس الاحتياطي الفدرالي الأمريكي بتثبيت سعر الفايدة ايه اللي هيحصل في الأسواق المصرية وياترى البنك المركزي المصري هيعمل ايه في اجتماعه في فبراير الجاي.

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

زي المتوقع قرر البنك الفدرالي الأمريكي  تثبيت أسعار الفايدة دون تغيير خلال اجتماعه الأخير من ساعات ودا أثار تساؤلات حولين تأثير القرار على الاقتصادات الناشئة وفي مقدمتها الاقتصاد المصري مصر والحقيقة فيه أكتر من رأي بين خبراء الاقتصاد بخصوص تأثيرات قرار الفيدرالي.

وببساطة فيه فريق شايف ان تثبيت سعر الفايدة الأمريكية بيحمل الأسواق الناشئة مزيد من الأعباء المالية وفريق تاني شايف إن البنك المركزي المصري هيتجه إلى خفض أسعار الفايدة على غرار الدول المجاورة ورجحوا خفض مصر الفايدة بـ7 نقاط مئوية إلى 21% مقابل 28% حاليا لكن الرأي الغالب إن  تراجع معدلات الفايدة الأمريكية هيكون ليه تأثير ايجابي على الاقتصاد المصري لأنه هيساهم في خفض خدمة الدين، لأن ارتفاع الفايدة الأمريكية هيزيد من خدمة الديون في الأسواق الناشئة ومنها ديون مصر وكمان الخفض هيوفر  مرونة لرؤوس الأموال للخروج من الأسواق الكبري متجهه إلى الأسواق النامية والناشئة للحصول على فرص استثمارية افضل وبعائد أكبر وقرار التثبيت طبعا هيبقي الوضع على ما هو عليه  حاليا لأن الفايدة الأمريكية على ماهية عليه لسه عليها اقبال كبير من رؤوس الأموال ومش هتقل غير لما أسعار الفايدة تنزل وبالتالي رؤوس الأموال هتدور على أسواق تانية بتدي سعر أعلي.

طيب لجنة السياسة النقدية في البنك المركزي المصري ناوية على إيه ؟
معروف إن اللجنة هتعقد أول اجتماع ليها في 2025 في فبراير الجاي وقرار خفض الفايدة أو تثبيته بتتحكم فيه  عدة عوامل محلية وأهمها تراجع معدلات التضخم ورغم تراجع معدل التضخم السنوى لإجمالى الجمهورية خلال ديسمبر اللي فات للشهر التانى على التوالى ليسجل 23.4%، مقابل 25% فى نوفمبر اللي قبله وفق بيانات الجهاز المركزى للتعبئة العامة والإحصاء لكن الخبراء شايفين أن المركزي هيخفض سعر الفايدة في اجتماع استثنائي ربما يكون في مارس أو في الاجتماع العادي في أبريل وإن اجتماع فبراير هيتم فيه تثبيت سعر الفائدة وشايفين كمان إن أي تخفيض لسعر الفايدة الأمريكية هيكون محفز للبنك المركزي المصري أنه ينزل سعر الفايدة بوتيرة أسرع.

وزي ما احنا عارفين إن البنك المركزى فى آخر اجتماعاته فى 2024 قرر تثبيت أسعار الفائدة عند مستوياتها 27.25% للايداع و28.25% والاقراض.

طيب ايه فايدة تخفيض الفايدة على الأسواق المصرية ؟
حسب خبراء الاقتصاد تخفيض سعر الفايدة هيساعد في انتعاش حركة التجارة والبناء والأنشطة الاقتصادية التانية لانه هيحرك عجلة الاقتراض للشركات والافراد وخاصة شركات التطوير العقاري واللي جزء كبير منها بيعتمد على برامج التمويل البنكية في مشروعاتها وتخفيض كلفة الفايدة هيقلل من تكلفة المشروعات واسعار العقارات هتنزل ودا هيساعد في تسريع وتيرة عمل الشركات وقطاع زي قطاع البناء بيحرك كل الأسواق وخاصة مواد البناء والصناعات المرتبطة بيه زي صناعة الأدوات الكهربائية ومصانع الادوات الصحية ومصانع الاخشاب والحديد والأسمنت والبويات وغيرها.