هي ليه مصر هتبني عاصمة إدارية تانية في غرب مصر - غاية التعليمية

غاية التعليمية يكتُب.. النهاردة الدكتور مصطفي مدبولي بيزور محافظة الوادي الجديد واكتشفنا إن مصر بنت عاصمة إدارية جديدة هناك.. ياترى إيه السبب وإيه الغرض منها وهي عبارة عن أيه.. خليكم معانا للأخر وهنعرف التفاصيل كلها في التقرير دا

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

كلنا عارفين العاصمة الادارية الجديدة اللي بتبينها مصر في طريق السويس لكن كتير مننا مكانش يعرف إن فيه عاصمة إدارية تانية بتتبني في غرب مصر وتحديدا في محافظة الوادي الجديد واللي بتعتبر أكبر محافظات مصر بمساحة 440 ألف كيلو متر مربع ودي مساحة بتساوي مساحة دول حولينا وعشان كده فيها فرص اقتصادية مهولة وتأهيلها معناه إن فيه مصرتانية هتروح هناك وأي مشروعات للتعمير والتنمية هتفرق كتير في الأرض البكر..

النهاردة محافظة الوادي الجديد بتستقبل رئيس مجلس الوزراء لتفقد وافتتاح عدد من المشروعات التنموية والخدمية المهمة، يرافقه عدد من الوزراء ومن أبرز محطات الزيارة، افتتاح العاصمة الإدارية في الوادي الجديد، أي زي ماحضرتك سمعت كده العاصمة الادارية التانية لمصر واللي بتعتبر  نسخة مصغرة من العاصمة الإدارية الجديدة، وأول عاصمة إدارية بتتبني في المحافظات.

طيب العاصمة الإدارية التانية لمصر عبارة عن إيه؟
شوف ياسيدي مشروع العاصمة الادارية التانية بيقام على مساحة 101 فدان بمدينة الخارجة، وبتضم أكبر مجمع حكومي مميكن للمديريات التابعة للوزارات المختلفة، إضافة إلى مدينة رياضية بتعتمد على التحول الرقمي في تقديم خدماتها وخد المفاجأة  الكبيرة تم الانتهاء من المرحلة الأولى من المشروع واللي شملت إنشاء مباني للجهات الحكومية، ومباني للأنشطة التجارية، ومبنى خاص بالتعامل مع الجمهور، إلى جانب شبكة طرق ومرافق حديثة.
زي ماقلنا لحضراتكم دي أول عاصمة إدارية تكون في المحافظات والهدف منها خلق مجتمعات جديدة واكتشاف فرص واعدة في كل المجالات والتسهيل على المستثمرين ورجال الأعمال والهيئات الاقتصادية والمالية زي البنوك والشركات الأجنبية وغير جذب الشباب والأسر والتجمعات للمناطق الجديدة.. واللي متعرفوش محافظة وداي الجديد فيها امكانيات اقتصادية وسياحية كبيرة جدا وفيها كمان ثروات ضخمة تحت الأرض ولو تم استغلالها أكيد هتضيف إضافة عظيمة للاقتصاد المصري ودا حضرتك لللي بيحصل دلوقتي ودا سبب زيارة الدكتور مصطفي مدبولي للمحافظة الأكبر في مصر واللي هيفتتح مشروعات كبيرة ومهمة في المحافظة هتساعد في انطلاقة جديدة بالمنطقة كلها.

تقدر دلوقتي تتخيل الوداي الجديد هتبقي ازاي في المستقبل وإزاي ممكن يكون فيها مدن زكية ومطارات ومناطق صناعية ومشروعات زراعية وليلة كبيرةز

طيب ياترى هيكون فيه عواصم إدارية تانية في المحافظات؟
نجاح التجربة هو اللي هيحكم ولو نجحت تجربة العاصمة الادارية في الوادي الجديد أكيد الحكومة هتفكر تاني تكررها في بقية المحافظات ودا وارد جدا واي مشروع هيشجع الاقتثصاد والاستثمار الدولة هتنفذه على طول، وخاصة لو كانت مشروعات زي العاصمة الادارية كده واللي بتعتبر واجهة مشرفة لمصر أمام مجتمع المال والأعمال والبيزنس والاستثمارات العالمية.