بعني إيه عجز في الميزان التجاري لمصر.. بيحصل امتى؟ وبيأثر على حياتنا إزاي؟ - غاية التعليمية

غاية التعليمية يكتُب.. هو ليه عجز الميزان التجاري لمصر زاد 13% في ديسمبر؟ وإيه أصلا الميزان التجاري ده؟ وليه لما يعلى أو يقل ممكن يأثر على الاقتصاد؟ وهل ده معناه إننا بنستورد أكتر ما بنصدر؟ ولا فيه عوامل تانية؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

الجهاز المركزي للتعبئة العامة والإحصاء أعلن إن عجز الميزان التجاري لمصر ارتفع لـ 4.15 مليار دولار في ديسمبر 2024، مقارنة بـ 3.67 مليار دولار في نفس الشهر من 2023، يعني زاد بنسبة 13%.

طب يعني إيه أصلا ميزان تجاري؟

ببساطة الميزان التجاري هو الفرق بين قيمة الصادرات والواردات بتاعة أي دولة.. ولو الدولة بتصدر أكتر ما بتستورد يبقى عندها فائض تجاري وده شيء إيجابي لأنه بيزود احتياطي النقد الأجنبي ويدعم العملة المحلية.. أما لو الدولة بتستورد أكتر ما بتصدر، يبقى عندها عجز تجاري، وده ممكن يضغط على العملة المحلية ويرفع الاحتياج للعملة الصعبة.

طيب ليه العجز التجاري زاد في ديسمبر؟

السبب الأساسي هو إن واردات مصر زادت أكتر من الصادرات.. الصادرات زادت بنسبة 9.6% ووصلت لـ 3.96 مليار دولار بدل 3.61 مليار دولار في ديسمبر 2023.

وده كان بسبب ارتفاع صادرات منتجات زي منتجات البترول اللي زادت 128.5% الفواكه الطازجة  23.4% والملابس الجاهزة  17.6% والعجائن والمنتجات الغذائية المتنوعة 37.1%.

لكن في نفس الوقت، بعض الصادرات انخفضت، زي الأسمدة اللى نزلت  47.6% والبترول الخام 66.2% والبقول الجافة 3.5%.

فى المقابل الواردات زادت بنسبة 11.3% ووصلت لـ 8.11 مليار دولار بدل 7.28 مليار دولار.
وده كان بسبب ارتفاع واردات بعض السلع، أهمها الغاز الطبيعي زاد 105.2% وسيارات الركوب  17% والذرة  38.6% واللدائن "البلاستيك الخام" 15.8%.

وفيه بعض الواردات انخفضت زي منتجات البترول اللى انخفضت 23.6% ومواد أولية من الحديد والصلب 12.9%و الأدوية والمستحضرات الصيدلانية 22.3%.

طب ازاى زيادة العجز التجاري ممكن تأثر علينا؟

زيادة العجز التجاري معناه ضغط على الجنيه المصري لأن الدولة هتحتاج أكتر للدولار عشان تستورد.. وده ممكن يأثر على سعر الصرف.. كمان  زيادة الفجوة التمويلية.. لأن  لما الاستيراد يعلى والصادرات متكفيش الدولة ممكن تلجأ للاقتراض أو استخدام الاحتياطي النقدي لسد الفجوة.

بالاضافة طبعا لتأثير على الأسعار لو تكلفة الاستيراد زادت ده ممكن يتسبب في ارتفاع الأسعار محليًا، خصوصًا في المنتجات اللي مصر بتعتمد على استيرادها.

طب إيه الحل؟

الحل في زيادة الصادرات من خلال دعم الصناعة المحلية وتحفيز الشركات على التصدير وتقليل الاعتماد على الاستيراد، خصوصًا في المنتجات اللي ممكن يتم تصنيعها محليًا وتشجيع الاستثمار في القطاعات الإنتاجية عشان نقلل الفجوة بين الاستيراد والتصدير.

الحاجة المهمة اللى لازم كلنا نعرفها ان ارتفاع العجز التجاري مش مجرد رقم لكنه مؤشر مهم على أداء الاقتصاد.. ولما الواردات تزيد والصادرات متواكبش الزيادة دي .. بيحصل ضغط على العملة والأسعار والسيولة بالدولار.. عشان كده الحل مش بس في تقليل الاستيراد.. لكن الأهم هو تعزيز الإنتاج المحلي والتصدير عشان نوصل لتوازن اقتصادي أفضل.