من غير صندوق ولا قروض.. 29.6 مليار دولار دخلت خزينة الدولة.. هنقولك جايين منين؟ - غاية التعليمية

غاية التعليمية يكتُب.. في مبلغ ضخم دخل مصر في 2024 ممكن يغير شكل الاقتصاد تمامًا.. مبلغ مش من قرض ولا استثمار خارجي..  لكنه جاي من المصريين اللي عايشين بره.. عارف كام الرقم؟ 29.6 مليار دولار..  أيوه تحويلات المصريين زادت بنسبة 51% مقارنة بالسنة اللي فاتت.. السؤال هنا..  ليه المصريين رجعوا يحولوا فلوسهم تاني بعد التراجع اللي كان حاصل؟ وهل ده كفاية عشان نحل أزمة الدولار؟ وازاى البنك المركزى قدر يستعيد ثقة العاملين فى الخارج بالقطاع المصرفي؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

البنك المركزي المصري أعلن إن تحويلات المصريين في الخارج ارتفعت بشكل غير مسبوق خلال 2024.. وسجلت في شهر ديسمبر لوحده 3.2 مليار دولار.. وده أعلى مستوى ليها من بعد تحرير سعر الصرف.. بالمقارنة بشهر ديسمبر 2023 الرقم كان 1.6 مليار بس، يعني تضاعف تقريبًا.

ولو بصينا على النص الأول من السنة المالية 2024-2025 هنلاقي إن التحويلات سجلت 17.1 مليار دولار، بزيادة 80% عن نفس الفترة السنة اللي فاتت.. وده مؤشر قوي إن الثقة في القطاع المصرفي المصري بدأت ترجع وإن في تغييرات بتحصل على أرض الواقع.

طب.. ليه فجأة المصريين برا بقوا يحولوا فلوسهم عبر البنوك المصرية وما يلجأوش للسوق السودا زي قبل كده؟

هنا لازم نبص على كام حاجة أهماه تحرير سعر الصرف.. لما الجنيه بقى بسعره الحقيقي وفرق السعر بين الرسمي والسوق السودا بقى قليل جدًا المصريين لقوا إن مفيش داعي يحولوا عبر قنوات غير رسمية.. كمان الإجراءات المشددة ضد السوق السودا.. الدولة والبنك المركزي شنوا حملات قوية لضبط سوق الصرف وده خلى الناس تعتمد أكتر على القنوات الرسمية..بالاضافة كمان لارتفاع الفوائد على الودائع الدولارية.. البنوك المصرية قدمت عوائد مغرية جدًا للمصريين اللي عايزين يحتفظوا بالدولار.. فبقوا يحولوا فلوسهم من برا للاستفادة منها.

طب ايه تأثير اللى حصل ده على الوضع الاقتصادي فى البلد ؟

ارتفاع التحويلات معناه دخول سيولة دولارية أكبر.. وده بيقلل الضغط على الاحتياطي النقدي.. وليدعم قدرة البنوك على توفير الدولار للمستوردين والشركات.. وده معناه إن الأسعار ممكن تستقر أكتر وإن الطلب على الدولار من السوق السودا يقل تدريجيًا.. وده اللي بدأنا نشوفه فعلًا مع انخفاض سعر الدولار الموازي واقترابه من السعر الرسمي.

السؤال الأهم .. هل البنك المركزي هيستمر فى طرح أداوت جديدة لجذب اموال المصريين فى الخارج؟

المركزي مهتم جدا باعادة الثقة  اكتر واكتر فى القطاع المصرفي وبيحاول بكل الطرق يقدم حوافز للمصريين فى الخارج عشان يحولوا فلوسهم من خلال البنوك ويقضي على اى محاولات لعودة المضاربة على سعر الدولار من جديد والحقيقة المركزي حقق نتايج مذهلة فى الملف ده ومستمر فى تحركاته للقضاء على السوق السودا للعملة.