البنك المركزي ناوي على إيه في باقي 2025.. هنقولك السيناريو الأقرب - غاية التعليمية

غاية التعليمية يكتُب.. يا ترى البنك المركزي المصري ناوي على ايه بعد ما ثبت أسعار الفايدة في أول اجتماع للجنة السياسة النقدية في 2025؟ هل هيستمر في التثبيت ولا فيه خطة تانية؟ وهيعمل ايه في معركة التضخم اللى بيتوحش يوم بعد يوم؟

اخر الاخبار العاجلة عبر غاية التعليمية أخبار محلية ودولية، وكذلك أخبار الر ياضة وخاصة كرة القدم يلا كورة و يلا شوت اليوم.

يوم الخميس  اللي فات 20 فبراير 2025 البنك المركزي عقد أول اجتماع للجنة السياسة النقدية في السنة الجديدة.. وقرر إنه يسيب أسعار الفايدة زي ما هي 27.25% للإيداع و28.25% للإقراض.. يعني  مفيش خفض ولا رفع..  تثبيت للمرة الخامسة على التوالي من آخر 2024.

طب ليه المركزي استمر فى سياسته التشددية فيما يتعلق بالفايدة؟

البنك شايف إن التضخم لسه مرتفع يعني معدل التضخم في نوفمبر 2024 كان 25.5% وده أقل من الشهور اللي قبلها بس لسه مش في المنطقة الآمنة.. وعشان كده البنك المركزي  بيلعبها حذر.. عايز يضمن إن التضخم يفضل ماشي في الطريق النزولي من غير ما يعمل حركة مفاجئة تخلّص على استقرار السوق.

كمان فيه عوامل تانية لعبت دور زي مثلاً التوترات الجيوسياسية اللي لسه موجودة وأسعار السلع العالمية اللي ممكن تترفع في أي لحظة.. و البنك عايز يبقى متأكد إن الاقتصاد المصري يستحمل أي صدمات جديدة خصوصاً بعد ما شافنا إزاي أسعار الوقود والكهرباء أثرت على التضخم في 2024.. فالتثبيت ده زي ما يكون البنك بيقول: 'أنا هاستنى شوية، أشوف الأمور رايحة فين، وبعدين أقرر".

طب دلوقتي البنك ناوي على إيه في الشهور الجاية؟

التوقعات بتقول إن البنك المركزي مش هيستمر في التثبيت طول السنة.. فيه خبراء كتير زي هشام عز العرب رئيس البنك التجاري الدولي قال إنه متوقع التضخم ينزل لـ15% في أبريل أو مايو 2025.. وده معناه إن البنك ممكن يفكر جدياً في خفض الفايدة بشكل تدريجي.. يمكن ربع أو نص في المية في الاجتماعات الجاية زي اللي هيكون يوم 17 أبريل أو 22 مايو.

وليه بقى التخفيض ده ممكن يحصل؟

عشان البنك شايف إن التضخم بدأ فعلاً يهدى من أول 2025.. السياسة النقدية التقييدية اللي اتبعها البنك المركزي  من سنة 2024 هتبدأ تظهر نتايجها الكبيرة.. يعني الضغط على الأسعار هيقل.. وده هيدي فرصة للبنك إنه يخفف شوية من أسعار الفايدة.. عشان يدي دفعة للاستثمار والنمو الاقتصادي.

بس بردو البنك مش هيعمل الحركة دي على طول..هيستنى يتأكد إن التضخم مش هيرجع يطلع تاني وإن السوق مستعد يستقبل التخفيض ده من غير ما يحصل فوضى.

فيه سيناريو تاني ممكن يحصل لو التضخم ما هديتش زي ما متوقع.. أو لو حصلت صدمة جديدة زي ارتفاع أسعار البترول عالمياً.. ساعتها البنك ممكن يفضل متمسك بالتثبيت أو في أسوأ الحالات يرفع الفايدة تاني.. بس ده مش السيناريو الأقرب دلوقتي لأن كل المؤشرات بتقول إن الاقتصاد المصري بيستقر تدريجياً

طب معركة التضخم دي هتخلّص امتى؟

البنك المركزي حاطط هدف كبير قدام عينيه إنه يوصل التضخم لـ7% بحلول آخر 2026 و5% بحلول 2028.. بس في 2025 الهدف الأولاني هو إن التضخم ينزل بشكل ملحوظ من أول السنة.. التوقعات بتقول إن بداية من الربع الأول يعني من يناير لمارس التضخم هيبدأ يتراجع بقوة بفضل قرارات التشديد النقدي اللي خدتها الحكومة والبنك قبل كده.